Runn 6.

Teepries fallt up stünds andaal

Onna Behrends un Thiele Bünting van de "Hoogschool för Wertskupp- Tee, Beer un Genever (STBG)“ hebben rutfunnen, dat de Teepries up´d Markt na een origen Gesetz up stünds daal fallt un denn so tomaal weer anstiegt:
Man ha immer meent, dat de Marktpriesen för Tee tofällig dörnanner komen of dat Butenlänners un Seeräubers de Markt dör Spökenkiekeree unnerster- boven brengen, sodat neet immer all gifft, wat brukt word. „Un dar hebben wi nu rutfunnen, dat dat heel anners löpt: ", vertellt Thiele Bünting, “wenn ´n bült Lü kopen, gifft bi de Händlers neet so völ Tee as brukt word. Denn betalen de Lü freewillig mehr Geld um de Resten uptokopen. Dat hebben de Marktlü spitz kregen: Se verkopen hörs Reev so tomaal dürder. Later hett denn weer kieneen Geld, Tee to kopen.“ „Un denn mutt de Händler sien Tüüg weer billigst ofstöten, anners köfft dat kienen; dat hett, as wi nu löven, mit Angebood un Nafraag to don“, weet sien Fro Onna Behrends.
Disse neje Weten sall besünners de Regeeren helpen, de Versörgen van de Inwohners mit Tee to verbetern. Man will nu reguleerend ingriepen un bloot Tee kopen, wenn´t billiger is, mit de Utsicht, dat de Priesen denn later weer nor baben scheeten.
Besünners blied is man, dat ok up anner Kant een bült Geld spaart worden kann: Man brukt nu neet mehr so faken Lü to verbrannen, de beschuldigt sünd Hexeree to bedrieven.
"Dat spaart een heiden Geld vör Brannholt, wat wi good anners för bruken könen", grient Rewert Brandes tofree, "Bispillen gifft dat genoog."

För hör Wark worden Onna Behrends un hörs Mann Thiele Bünting tokommen Saterdag mit de „Wetenskuppspries Ubbo Emmius“ uttekend worden.